`रेशम फिलिली` प्रिमियर

पारी त्यो डाँडामा' बोलको गीतका कारण नै राम्रो उचाई पाएको फिल्म 'रेशम फिलिली' आजबाट देशभरका हलमा लागेको छ । फिल्मको बिहिबार बेलुकी काठमाण्डौको कुमारी हलमा प्रिमियर शो गरिएको छ । रातो कार्पेटलाई हटाउँदै सुकुले ओच्छ्याएर गरिएको प्रिमियर फरक देखियो । 

 

प्रिमियरमै यो फिल्म हेर्नका लागि फिल्मकर्मी, पत्रकार र अन्य विभिन्न क्षेत्रका मानिसहरुमा एक प्रकारको उत्साह देखियो । फिल्म हेर्दा हलमा हाँसो गुञ्जायमान भयो । विनय श्रेष्ठ, कर्मा, मेनुका प्रधानको साथमा फिल्ममा नयाँ अनुहार छन्, कामेश्वर चौरासिया । तर, फिल्म हेरेर बाहिर आएपछि दर्शकले कामेश्वरलाई मात्र सम्झिए । 

 

माधव वाग्ले र विनय श्रेष्ठको निर्माणमा तयार भएको यो फिल्मले रेशम नाम गरेको एक पात्रको कथालाई प्रस्तुत गरेको छ । गाउँबाट बहिनी सुन्तलीको बिहे गर्ने सोचका साथ विदेश जान आएको यूवक दलालले फसाएपछि काठमाण्डौमै रनभुल्लमा पर्छ । यसपछि उसको जिवनमा आउने उतारचढाव नै फिल्मको कथावस्तु हो ।

 

प्रणव जोशीले निर्देशन गरेको यो फिल्मको चर्चित गीत 'पारी त्यो डाँडामा'को दृश्यले दर्शकलाई सन्तुष्ट बनाउँदैन । गीत अनुसार दृश्य शुन्य जस्तै छ । फिल्म मध्यम छ । 

 

फिल्म हेर्नका लागि अभिनेत्रीहरुको बाक्लो उपस्थिती हलमा देखियो । कुमारी हलका २ वटै पर्दामा फिल्म देखाइएको थियो । धेरै संचारकर्मीदेखि अन्य विभिन्न क्षेत्रका मानिसहरुले पास नपाएर घर फर्किए ।